ന്യൂഡൽഹി: മുഖ്യതെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ട് ഇന്നും ഡൽഹിയിൽ പ്രക്ഷോഭത്തിനൊരുങ്ങി ഇടത് വിദ്യാർഥി സംഘടനകൾ. ജന്തർ മന്തറിൽ സമരത്തിന് അനുമതി തേടി സിജെപി വീണ്ടും പൊലിസിനെ സമീപിക്കും. ഇന്ത്യാ സഖ്യയോഗവും ഇന്ന് ചേരും. വൈകിട്ട് സുപ്രീംകോടതിയിലേക്ക് മാർച്ച് നടത്തും.
അതേസമയം, മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെ നീക്കണമെന്ന് ആവശ്യപ്പെടുന്ന പ്രമേയം മുഖ്യമന്ത്രി ഇന്ന് നിയമസഭയിൽ അവതരിപ്പിക്കും. എൽഡിഎഫ് പിന്തുണയ്ക്കും. അതേ സമയം ബിജെപി എതിര്‍ക്കും. ഗ്യാനേഷിന് കീഴിൽ നടന്ന തെരഞ്ഞെടുപ്പുകൾ അട്ടിമറിയാണെങ്കിൽ മുഖ്യമന്ത്രി രാജിവയ്ക്കണമെന്നാണ് ബിജെപിയുടെ ആവശ്യം. ഇക്കാര്യം ഉന്നയിച്ച് ഇന്ന് നിയമസഭാ മാർച്ചും നടത്തും.
രാഹുലിന്‍റെ നേതൃത്വത്തിൽ ഇന്ന് സുപ്രീംകോടതി മാർച്ച്; ചീഫ് ജസ്റ്റീസ് സന്ദർശനാനുമതി നിഷേധിച്ചു
ന്യൂഡൽഹി: രാജ്യതലസ്ഥാനത്തെ പ്രതിഷേധം മർക്കടമുഷ്‌ടികൊണ്ട് അടിച്ചമർത്താൻ പൊലിസ് ശ്രമിക്കുമ്പോഴും സമരം കത്തിക്കയറുകയാണ്. പ്രതിഷേധ ഭൂമിയായ ജന്തർ മന്തർ കൊട്ടിയടച്ചെങ്കിലും അഞ്ച് കിലോമീറ്ററിനപ്പുറം തിരക്കേറിയ കൊണാട്ട് പ്ലേസിൽ കൃത്യമായ ഇടവേളകളിൽ ഇടതുപക്ഷ വിദ്യാർഥി – യുവജന സംഘടനകൾ ഇന്നലെ രാത്രിവരെ പ്രതിഷേധക്കൊടുങ്കാറ്റ് അഴിച്ചുവിട്ടു.
പൊലിസ് കസ്റ്റഡിയിൽനിന്നു മജിസ്ട്രേറ്റ് മോചിപ്പിച്ച സിജെപി നേതാക്കൾ ഗ്യാനേഷ് കുമാറിന്‍റെ രാജി ആവശ്യപ്പെട്ടുള്ള പ്രതിഷേധം തുടരുമെന്ന് ഡൽഹിയിൽ നടത്തിയ വാർത്താ സമ്മേളനത്തിൽ വ്യക്തമാക്കിയിട്ടുണ്ട്. പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ സുപ്രീംകോടതിയിലേക്ക് ഇന്ന് മാർച്ച് നടത്തും. ഇതിനായി ഇന്ത്യ മുന്നണി നേതാക്കൾ ഡൽഹിയിലെത്തും. എന്നാൽ, കോടതിയെ നിയമപരമായി സമീപിക്കാൻ പറഞ്ഞുകൊണ്ട് സുപ്രീംകോടതി ചീഫ് ജസ്റ്റീസ് സൂര്യകാന്ത് രാഹുലിനും ഖാർഗയ്ക്കും അദ്ദേഹത്തെ കാണുന്നതിനുള്ള അനുമതി നിഷേധിച്ചു. സുപ്രീംകോടതി ചീഫ് ജസ്റ്റീസിനെ നേരിൽ കണ്ട് നിവേദനം നൽകാനായിരുന്നു നീക്കം. ജനാധിപത്യ സംരക്ഷണത്തിന് കക്ഷിഭേദമെന്യേ രാജ്യത്തെ എല്ലാ പൗരന്മാരും ഇന്നു നടക്കുന്ന സുപ്രീംകോടതിയിലേക്കുള്ള മാർച്ചിൽ പങ്കെടുക്കാൻ രാഹുൽ ഗാന്ധി ആഹ്വാനം ചെയ്തിട്ടുണ്ട്. യുവാക്കളും വിദ്യാർഥികളും പൊലിസിന്‍റെ ക്രൂരമർദനത്തിന് ഇരകളായെങ്കിലും ഗ്യാനേഷ് കുമാറിന്‍റെ രാജിയിൽനിന്ന് പിന്നോട്ടില്ലെന്ന് ഉറപ്പിച്ചുകൊണ്ടാണ് ഇന്നലെയും ഡൽഹിയുടെ തെരുവുകൾ സമരച്ചൂടിൽ തിളച്ചത്. ഉത്തർപ്രദേശ് പൊലിസിനെയും കേന്ദ്രസേനയെയും കളത്തിലിറക്കിയാണ് ഡൽഹി പൊലിസ് ഇന്നലെ പ്രതിഷേധക്കാരെ നേരിട്ടത്. പൊലിസ് നരനായാട്ടിൽ നിരവധി പ്രതിഷേധക്കാർക്ക് പരിക്കേറ്റു.
പ്രതിഷേധം റിപ്പോർട്ട് ചെയ്യാനെത്തിയ മലയാളി മാധ്യമപ്രവർത്തകരെ ഉൾപ്പടെ ഡൽഹി പൊലിസ് ഇന്നലെ കസ്റ്റഡിയിലെടുത്തു. വിദ്യാർഥികളെ മർദിക്കുന്ന ദൃശ്യങ്ങൾ പകർത്താനെത്തിയ മാധ്യമപ്രവർത്തകരാണ് പൊലിസ് നടപടിക്ക് വിധേയരായതെന്ന ആരോപണവും ഉയരുന്നുണ്ട്.
കേരളത്തിൽനിന്നുള്ള രാജ്യസഭാംഗം ജോൺ ബ്രിട്ടാസിനും ഡൽഹി പൊലിസിന്‍റെ അതിക്രമം നേരിടേണ്ടിവന്നു. മാധ്യമങ്ങളോട് സംസാരിക്കവേ കൊണാട്ട് പ്ലേസിൽനിന്ന് ബലമായി കസ്റ്റഡിയിലെടുത്ത ബ്രിട്ടാസിനെ പിന്നീട് വഴിയിൽ ഇറക്കിവിടുകയാണുണ്ടായത്. സിപിഐ നേതാവ് ആനി രാജയെയും പൊലിസ് കസ്റ്റഡിയിലെടുത്ത് വിട്ടയച്ചു. വിദ്യാർഥി നേതാക്കളായ നേഹ ബോറ, ഐഷി ഘോഷ്, ആദർശ് എം. സജി തുടങ്ങിയവരെയും പൊലിസ് കസ്റ്റഡിയിലെടുത്തു. ശനിയാഴ്ചത്തേതിൽനിന്നു വ്യത്യസ്തമായി മെട്രോ ഉൾപ്പടെ പൊതുഗതാഗതം പൂർണമായും തുറന്നു കൊടുത്തിരുന്നു. അതിനാൽ ജന്തർ മന്തറിനു പുറത്ത് പ്രതിഷേധം നടക്കുന്ന കൊണാട്ട് പ്ലേസ്, ആർകെ ആശ്രം മാർഗ് തുടങ്ങിയ സ്ഥലത്തേക്ക് എത്തുന്നതിന് പ്രതിഷേധക്കാർക്ക് തടസമുണ്ടായിരുന്നില്ല.
കോടതിയിലുള്ള വിശ്വാസം നഷ്‌ടപ്പെട്ടു: കപിൽ സിബൽ
ന്യൂഡൽഹി: പൗരന്മാരുടെ അവകാശങ്ങൾ സംരക്ഷിക്കുന്നതിനായി കോടതിയെ വീണ്ടും സമീപിക്കുന്നതിൽ തനിക്ക് വിശ്വാസം നഷ്‌ടപ്പെട്ടതായി സുപ്രീംകോടതിയിലെ മുതിർന്ന അഭിഭാഷകനും രാജ്യസഭാംഗവുമായ കപിൽ സിബൽ. മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനും എസ്ഐആർ പ്രക്രിയയ്ക്കും എതിരേ ഡൽഹിയിൽ നടന്ന പ്രതിഷേധത്തിലെ പൊലിസ് നടപടിയെ വിമർശിച്ചുകൊണ്ട് നടത്തിയ വാർത്താസമ്മേളനത്തിലാണ് സിബൽ ഇക്കാര്യം പറഞ്ഞത്. എസ്ഐആറിലൂടെ നിരവധിപ്പേരെ അനധികൃതമായി ഒഴിവാക്കിയത് സംബന്ധിച്ച് സുപ്രീംകോടതിയെ പലതവണ സമീപിച്ചെങ്കിലും യാതൊരു ആശ്വാസവും ലഭിച്ചില്ലെന്ന് സിബൽ ആരോപിച്ചു.
എസ്ഐആറുമായി ബന്ധപ്പെട്ട് ബംഗാളിൽ അപ്പലേറ്റ് ട്രൈബ്യൂണലുകൾ 93 ശതമാനം കേസുകളിലും വോട്ടർമാരുടെ പേരുകൾ തിരികെ ചേർത്തു. ഇതോടെ എസ്ഐആറിൽ വീഴ്ച സംഭവിച്ചെന്ന് മനസിലായെങ്കിലും കോടതി ഇക്കാര്യത്തിൽ ഇടപെടില്ലെന്നു സിബൽ ചൂണ്ടിക്കാട്ടി. ഇക്കാലത്ത് ഭരണഘടനയെ സംരക്ഷിക്കാൻ സുപ്രീംകോടതിക്ക് കഴിയുമെങ്കിലും അവിടെ പോകുന്നതുകൊണ്ട് ഇനി പ്രയോജനമില്ലെന്ന് കരുതുന്നതായും സിബൽ പറഞ്ഞു.
എസ്ഐആർ സംബന്ധിച്ച് നിരവധി തെറ്റായ സംഭവങ്ങൾ സുപ്രീംകോടതിക്കു മുന്നിൽ ചൂണ്ടിക്കാട്ടിയ മുതിർന്ന അഭിഭാഷകനാണ് കപിൽ സിബൽ. ഗ്യാനേഷ് കുമാറിനെതിരേ ഡൽഹിയിൽ തുടരുന്ന പ്രതിഷേധ സമരങ്ങളിലും സിബൽ പങ്കെടുത്തിരുന്നു.
ഇന്നലെ സുപ്രീംകോടതി പ്രത്യേകമായി ചേർന്നപ്പോൾ സോളിസിറ്റർ ജനറൽ തുഷാർ മേത്ത സിബലിന്‍റെ പരാമർശം ജസ്റ്റീസ് ജോയ്മല്യ ബാഗ്ചി അധ്യക്ഷനായ ബെഞ്ചിന് മുന്നിൽ പരാമർശിച്ചിരുന്നു. എന്നാൽ ഇത്തരം പരാമർശങ്ങളെ നിയന്ത്രിക്കാനാകില്ലെന്നാണ് കോടതി പറഞ്ഞത്.
നിയന്ത്രണങ്ങൾ നീക്കണം: സുപ്രീംകോടതി
ന്യൂഡൽഹി: മുഖ്യതെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരേ രാജ്യതലസ്ഥാനത്ത് തുടരുന്ന പ്രതിഷേധം തടയുന്നതിന് ഡൽഹി പൊലിസ് ഏർപ്പെടുത്തിയ നിയന്ത്രണങ്ങൾ നീക്കാൻ ഉത്തരവിട്ട് സുപ്രീംകോടതി. ക്രമസമാധാനം തകരുന്ന സാഹചര്യങ്ങളിൽ ഒഴികെ മെട്രോ, റെയിൽവേ സർവീസുകൾ സാധാരണപോലെ പ്രവർത്തിക്കണമെന്ന് ഇന്നലെ നടത്തിയ പ്രത്യേക സിറ്റിംഗിൽ ജസ്റ്റീസുമാരായ ജോയ്മല്യ ബാഗ്ചി, വി. മോഹന എന്നിവരുടെ ബെഞ്ച് ഇടക്കാല ഉത്തരവിലൂടെ വ്യക്തമാക്കി. ഞായറാഴ്ച ഡൽഹിയിൽ പൊതുജീവിതം സ്തംഭിപ്പിച്ചുകൊണ്ട് പൊലിസ് ഏർപ്പെടുത്തിയ നിയന്ത്രണങ്ങൾ സുപ്രീംകോടതിയുടെ മുൻ ഉത്തരവുകൾ ലംഘിച്ചു എന്ന് ചൂണ്ടിക്കാട്ടി സമർപ്പിച്ച ഹർജിയാണ് പരിഗണിച്ചത്.
വിഷയത്തിൽ പ്രതികരണം തേടിയ സുപ്രീംകോടതി കേന്ദ്ര ആഭ്യന്തര മന്ത്രാലയം സെക്രട്ടറി ഗോവിന്ദ് മോഹൻ, ഡൽഹി പൊലിസ് കമ്മിഷണർ അനുരാഗ് കുമാർ, ഡൽഹി മെട്രോ ചെയർപേഴ്സൺ ഡി. താര എന്നിവർക്ക് നോട്ടീസ് അയച്ചു.
വെള്ളിയാഴ്ച സുപ്രീംകോടതിയുടെ അടിയന്തര ഹിയറിംഗിൽ, ജനജീവിതം സ്തംഭിപ്പിക്കുന്ന തരത്തിലുള്ള നിയന്ത്രണങ്ങൾ പുനഃപരിശോധിക്കണമെന്ന് ചീഫ് ജസ്റ്റീസ് സൂര്യകാന്ത് അധ്യക്ഷനായ ബെഞ്ച് ആവശ്യപ്പെട്ടിരുന്നു. ഇതിന് പിന്നാലെ നിയന്ത്രണങ്ങളുടെ ഭാഗമായി 57 മെട്രോ സ്റ്റേഷനുകൾ അടയ്ക്കണമെന്ന ആദ്യ ഉത്തരവ് പിൻവലിച്ച് പകരം 45 ആക്കി കുറച്ചിരുന്നു. എങ്കിലും സ്ഥിഗതികളിൽ കാര്യമായ മാറ്റം ഉണ്ടായില്ല.
റോഡുകളിലെ നിയന്ത്രണങ്ങൾ ജനജീവിതത്തെ പൂർണമായി ബാധിച്ചതായും അഭിഭാഷകർ കോടതിയിൽ ചൂണ്ടിക്കാട്ടി. കൂടാതെ അഭിഭാഷകർക്ക് പൊലിസ് മർദനം ഏറ്റതടക്കമുള്ള വിഷയങ്ങളും കോടതിയുടെ ശ്രദ്ധയിൽപ്പെടുത്തി.
ഇടക്കാല ഉത്തരവിലെ നിർദേശങ്ങൾ
ക്രമസമാധാനം ഉറപ്പാക്കിയും ഗതാഗതനിയമങ്ങൾക്ക് വിധേയമായും ജനങ്ങൾക്ക് സ്വതന്ത്രമായി സഞ്ചരിക്കാനുള്ള അവകാശമുണ്ട്. അത് ഉറപ്പാക്കണം.
ഇടക്കാല ഉത്തരവിലെ നിർദേശങ്ങൾ ഡൽഹിയിലെ റോഡുകളിൽ ബാരിക്കേഡ് നിരത്തിയത് അടിയന്തരമായി പുനഃപരിശോധിക്കണം.
ഇന്‍റർനെറ്റ് സേവനം തടസപ്പെടാതെ പ്രവർത്തിക്കണം
നിയമപ്രകാരമല്ലാതെയും നിരോധനാജ്ഞ ബാധകമല്ലാത്ത പ്രദേശങ്ങളിലെയും സമാധാനപരവും നിരായുധവുമായ ഒത്തുകൂടലുകളെ തടയുകയോ ആളുകളെ അനധികൃതമായി കസ്റ്റഡിയിലെടുക്കുകയോ ചെയ്യരുത്.
സുപ്രീംകോടതിക്കു മുന്നിൽ നിരോധനാജ്ഞ പ്രഖ്യാപിച്ചത് ചൂണ്ടിക്കാട്ടിയുള്ള ബോർഡ് എടുത്തുമാറ്റാൻ നിർദേശിച്ചു.
അഭിഭാഷകർ, മാധ്യമപ്രവർത്തകർ, മറ്റ് പ്രഫഷണലുകൾ എന്നിവർക്ക് അവരുടെ ഔദ്യോഗിക ജോലികൾ നിർവഹിക്കുന്നതിൽ യാതൊരുവിധ തടസങ്ങളും ഉണ്ടാകരുതെന്നും നിർദേശം നൽകി.
ശക്തമായ വാദപ്രതിവാദങ്ങൾ
പ്രതിഷേധങ്ങൾ സമാധാനപരമായിരിക്കണമെന്നും മറ്റുള്ളവരെ പ്രകോപിപ്പിക്കരുതെന്നും ഓർമിപ്പിച്ച കോടതി, മൗലികാവകാശങ്ങൾ സംരക്ഷിക്കാൻ തങ്ങൾ ബാധ്യസ്ഥരാണെന്നും വ്യക്തമാക്കി. പ്രതിപക്ഷ നേതാക്കളുടെ കരുതൽ തടങ്കലിനെയും പൊലിസിന്‍റെ അതിക്രമങ്ങളെയും ചോദ്യം ചെയ്ത് തൃണമൂൽ കോൺഗ്രസ് എംപി മേനക ഗുരുസ്വാമി, അഡ്വക്കറ്റ് അമൻ പ്രസാദ് തുടങ്ങിയവർ കോടതിയെ സമീപിച്ചിരുന്നു.
ശനിയാഴ്ച ഡൽഹിയിൽ നടന്നത് പൊലിസ് രാജിന് തുല്യമായ നടപടിയാണെന്ന് മുതിർന്ന അഭിഭാഷകൻ ഷദൻ ഫറാസത്ത് വാദിച്ചു. ഫറാസത്തിനെ ഡൽഹി പൊലിസ് കസ്റ്റഡിയിലെടുത്തിരുന്നു. കൂടാതെ പ്രതിഷേധത്തിന് ട്രെയിൻ മുഖേന ഡൽഹിയിലേക്ക് എത്താൻ ശ്രമിച്ച വിദ്യാർഥികളെ മറ്റ് സംസ്ഥാനങ്ങളിൽ പൊലിസ് കസ്റ്റഡിയിലെടുത്ത നടപടിയും അഭിഭാഷകർ ചൂണ്ടിക്കാട്ടി. പ്രതിഷേധിക്കുന്നതു പോയിട്ട് കൂട്ടം‌കൂടിയാൽപോലും കസ്റ്റഡിയിലെടുക്കുന്ന നടപടിയാണ് ഉണ്ടായതെന്ന് അഭിഭാഷകർ ധരിപ്പിച്ചു.
ശനിയാഴ്ച മെട്രോ സർവീസുകൾ പൂർണതോതിൽ പ്രവർത്തിച്ചെന്നും 4,157 ട്രെയിനുകൾ സർവീസുകൾ നടത്തിയിട്ടുണ്ടെന്നും സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. സുരക്ഷാകാരണങ്ങളാൽ 303 സ്റ്റേഷനുകളിൽ 45 എണ്ണം മാത്രമാണ് അടച്ചിട്ടതെന്നും, നിലവിൽ എല്ലാ മെട്രോ സ്റ്റേഷനുകളും ഇന്‍റർനെറ്റ് സേവനങ്ങളും പൂർണമായി പ്രവർത്തിക്കുന്നുണ്ടെന്നും അദ്ദേഹം വ്യക്തമാക്കി.
ജനാധിപത്യം സംരക്ഷിക്കാൻ രാഹുലിന്‍റെ ആഹ്വാനം
ന്യൂഡൽഹി: ജനാധിപത്യം കാത്തുസൂക്ഷിക്കാൻ ആഹ്വാനം ചെയ്ത് സുപ്രീംകോടതിയിലേക്ക് ഇന്ന് ബഹുജനറാലി. സ്നേഹത്തോടും സാഹോദര്യത്തോടും രാജ്യസ്നേഹത്തോടും കൂടെ ഇന്ത്യ മുഴുവനും സുപ്രീംകോടതിയിലേക്ക് മാർച്ച് ചെയ്യുമെന്ന് ഇന്നലെ പുറത്തിറക്കിയ വീഡിയോ സന്ദേശത്തിൽ രാഹുൽ പ്രഖ്യാപിച്ചു. ഇതോടെ രണ്ട് ദിവസത്തെ ഇടവേളയ്ക്കുശേഷം ഇന്ത്യ മുന്നണിയിലെ പ്രധാന കക്ഷികൾ കൂടി പങ്കെടുക്കുന്നതോടെ രാജ്യതലസ്ഥാനം കൂടുതൽ പ്രക്ഷുബ്ധമാകും.
വെറുപ്പോ ദേഷ്യമോ ഇല്ലാതെ, സ്നേഹം നിറഞ്ഞ മനസോടെ സമാധാനപരമായി പ്രതിഷേധിക്കാൻ ഡൽഹിയിലേക്ക് എത്തിയ രാജ്യത്തെ യുവജങ്ങളെ പൊലിസും ബിജെപി ഗുണ്ടകളും ചേർന്ന് മർദിച്ചതായി രാഹുൽ കുറ്റപ്പെടുത്തി. ജനങ്ങൾ ആഗ്രഹിക്കുന്ന ഇന്ത്യ ഇങ്ങനെയല്ല.
ജാതി, മതം, സമൂഹം; എല്ലാത്തിനും അതീതമായി ഒന്നിച്ചുകൂടിയ ഇന്ത്യക്കാരായി സുപ്രീംകോടതിയിലേക്ക് മാർച്ച് നയിക്കണം. നരേന്ദ്ര മോദി, അമിത് ഷാ, അജിത് ഡോവൽ, മോഹൻ ഭാഗവത് എന്നിവർക്ക് ഇന്ത്യയെ നിശബ്‌ദമാക്കാൻ കഴിയില്ലെന്നും രാഹുൽ വീഡിയോ സന്ദേശത്തിൽ പറഞ്ഞു. ഭരണഘടനയുടെ പകർപ്പ് കൈയിലേന്തിക്കൊണ്ടായിരുന്നു രാഹുലിന്‍റെ സന്ദേശം.
വോട്ടുകൊള്ള അവസാനിപ്പിക്കുക, എസ്ഐആർ നിർത്തിവയ്ക്കുക, ഗ്യാനേഷ് കുമാറിന്‍റെ രാജി തുടങ്ങിയ ആവശ്യങ്ങൾ ഉന്നയിച്ചുകൊണ്ടുള്ള നിവേദനമാണ് തയാറാക്കിയിരുന്നത്. ചീഫ് ജസ്റ്റീസിനോട് ഒന്നും ആവശ്യപ്പെടുകയില്ലെന്നും എങ്കിലും രാജ്യത്തിന്‍റെ ആശങ്ക അദ്ദേഹത്തെ അറിയിക്കുമെന്നും രാജ്യസഭാ പ്രതിപക്ഷ നേതാവ് മല്ലികാർജുൻ ഖാർഗെയും വ്യക്തമാക്കിയിരുന്നു.
രാജ്യം ഭരിക്കുന്നത് ക്രിമിനൽ മനസുള്ളവർ: കെ.സി. വേണുഗോപാൽ
കണ്ണൂർ: മുഖ്യതെരഞ്ഞെടുപ്പ് കമ്മിഷണർ ഗ്യാനേഷ് കുമാറാണ് ഇന്ത്യ കണ്ട ഏറ്റവും വലിയ ക്രിമിനലെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി. ക്രിമിനൽ മനസുള്ള നരേന്ദ്ര മോദിയും അമിത് ഷായും ഗ്യാനേഷ് കുമാറിനെ കസേരയിലിരുത്തി ഇന്ത്യൻ ജനാധിപത്യം അട്ടിമറിക്കുകയാണെന്ന് വേണുഗോപാൽ പറഞ്ഞു. കണ്ണൂരിൽ മാധ്യമങ്ങളോടു സംസാരിക്കുകയായിരുന്നു അദ്ദേഹം.
ജനങ്ങളുടെ പിന്തുണയില്ലെങ്കിലും ഇലക്‌ട്രോണിക് വോട്ടിംഗ് മെഷീനും എസ്ഐആറും മുഖ്യതെരഞ്ഞെടുപ്പ് കമ്മിഷണറുമുണ്ടെങ്കിൽ അധികാരം നിലനിർത്താമെന്ന ധാർഷ്‌ട്യത്തിലാണു മോദി-ഷാ യുഗം മുന്നോട്ടു പോകുന്നത്.
ഈ സാഹചര്യത്തിലാണ് പ്രതിപക്ഷ കക്ഷികളുടെയും ഇതര സംഘടനകളുടെയും ജനകീയ സമരം. രാജ്യത്ത് തകർന്നുകൊണ്ടിരിക്കുന്ന ജനാധിപത്യ സംവിധാനങ്ങളെയും പൗരാവകാശങ്ങളെയും വീണ്ടെടുക്കുന്നതിനായി പ്രതിപക്ഷം നയിക്കുന്ന പോരാട്ടം രണ്ടാം സ്വാതന്ത്ര്യ സമരമാണെന്നും കെ.സി. വേണുഗോപാൽ പറഞ്ഞു.
അതിർത്തിയിൽ ചൈന ദിനംപ്രതി കടന്നുകയറ്റം നടത്തുമ്പോൾ അതിനെ പ്രതിരോധിക്കുന്നതിനേക്കാൾ ഭീമമായ പൊലിസ്-പാരാമിലിട്ടറി സന്നാഹങ്ങളെയാണു കേന്ദ്ര സർക്കാർ ഡൽഹിയിൽ സ്വന്തം പൗരന്മാർക്കെതിരേ വിന്യസിച്ചിരിക്കുന്നത്. വിവിധ സംസ്ഥാനങ്ങളിൽനിന്നു ബറ്റാലിയനുകളെ വിളിപ്പിച്ചുവരുത്തി സ്വന്തം രാജ്യത്തെ പൗരന്മാരോടും സാധാരണക്കാരോടും യുദ്ധം പ്രഖ്യാപിച്ചിരിക്കുകയാണ്. ജനാധിപത്യപരമായ മാർഗങ്ങളിലൂടെ ശബ്ദമുയർത്തുന്ന നേതാക്കളെയും മുൻ മുഖ്യമന്ത്രിമാരെയും ലോക്സഭയിലെ പ്രതിപക്ഷ നേതാവിനെയും സിആർപിഎഫിനെ വിട്ട് കൈകാര്യം ചെയ്യുന്നത് രാജ്യത്തിനുതന്നെ വലിയ അപമാനമാണെന്നും കെ.സി. വേണുഗോപാൽ ആരോപിച്ചു.
സമരം തുടങ്ങുംമുമ്പേ പ്രതിരോധം തീർക്കാൻ പൊലിസിനെ ഇറക്കുന്നത് കേന്ദ്ര ഭരണാധികാരികൾ ഭയന്നു തുടങ്ങിയതിന്‍റെ തെളിവാണ്. 56 ഇഞ്ചിൽനിന്നു നാല് ഇഞ്ചിലേക്കു ചുരുങ്ങിയ ഭീരുക്കളാണ് ഈ അടിച്ചമർത്തലുകൾക്കു നേതൃത്വം നൽകുന്നത്.
പാവപ്പെട്ടവർ ആശ്രയിക്കുന്ന ട്രെയിനുകൾ വരെ റദ്ദാക്കി ജനങ്ങളെ ഉപദ്രവിക്കുകയാണ്. ന്യായമായ സമരങ്ങളെ അടിച്ചമർത്തുന്നതും പ്രവർത്തകരെ വലിച്ചിഴയ്ക്കുന്നതും ഫാസിസത്തേക്കാൾ അപകടകരമാണെന്നും കെ.സി. വേണുഗോപാൽ പറഞ്ഞു. സർക്കാർ എത്ര തടസങ്ങൾ തീർത്താലും ഡൽഹിയിൽ അതിശക്തമായ സമരം സംഘടിപ്പിക്കുമെന്നും വേണുഗോപാൽ കൂട്ടിച്ചേർത്തു.
ജോണ്‍ ബ്രിട്ടാസ് ആശുപത്രിയില്‍
ന്യൂഡല്‍ഹി: ജോണ്‍ ബ്രിട്ടാസ് എംപിയുള്‍പ്പടെയുള്ള ഇടതു നേതാക്കളെയും പ്രവര്‍ത്തകരെയും പൊലിസും കേന്ദ്രസേനകളും ശാരീരികമായി ഉപദ്രവിച്ചുവെന്ന് പരാതി.
കൊണാട്ട് പ്ലേസില്‍ ഇന്നലെ നടന്ന ആദ്യപ്രതിഷേധങ്ങള്‍ക്കുശേഷം അവിടെ എത്തിയ ജോണ്‍ ബ്രിട്ടാസ് എംപി മാധ്യമങ്ങളോട് സംസാരിക്കുന്നതിനിടെയാണ് നൂറോളം കേന്ദ്രസേന ഉദ്യോഗസ്ഥര് ബലപ്രയോഗത്തിലൂടെ കസ്റ്റഡിയിലെടുത്ത് പൊലിസ് വാഹനത്തില്‍ കയറ്റിയത്.
വണ്ടിക്കുള്ളില്‍വച്ച് മുഖം പൊത്തിപ്പിടിച്ച് മര്‍ദിക്കുകയും അവശനായപ്പോള്‍ റോഡില്‍ ഉപേക്ഷിക്കുകയുമായിരുന്നുവെന്ന് ബ്രിട്ടാസ് പറഞ്ഞു. ശാരീരികാസ്വാസ്ഥ്യത്തെ തുടര്‍ന്ന് ജോണ്‍ ബ്രിട്ടാസിനെ ഡല്‍ഹി ആര്‍എംഎല്‍ ആശുപത്രിയില്‍ പ്രവേശിപ്പിച്ചിരിക്കുകയാണ്. സിപിഐ നേതാക്കളായ ആനി രാജയെയും പി. സന്തോഷ് കുമാറിനെയും വലിച്ചിഴച്ചാണ് കസ്റ്റഡിയിലെടുത്തത്.
ജയ്ക് സി. തോമസിനെ വിവസ്ത്രനാക്കി മര്‍ദിച്ചു
കൊണാട്ട് പ്ലേസില്‍ പ്രതിഷേധിച്ച ഡിവൈഎഫ്‌ഐ നേതാവ് ജയ്ക് സി. തോമസിനെ റോഡിലൂടെ ദീര്‍ഘദൂരം വലിച്ചിഴച്ചു വാഹനത്തിനുള്ളിലേക്ക് ഇടുകയായിരുന്നു. മറ്റ് പ്രവര്‍ത്തകരെയും സമാനമായ രീതിയില്‍ കൈകാര്യം ചെയ്യുന്നത് ചോദ്യം ചെയ്തപ്പോള്‍ വിവിസ്ത്രനാക്കി മര്‍ദിച്ചുവെന്ന് ജയ്ക് പറഞ്ഞു.
പൊലിസ് ആക്രമണത്തില്‍ എസ്എഫ്‌ഐ അഖിലേന്ത്യാ പ്രസിഡന്‍റ് ആദര്‍ശ് എം. സജിയുടെ കണ്ണിന് പരിക്കേറ്റു.
കസ്റ്റഡിയിലെടുത്ത നൂറിലധികം പ്രതിഷേധക്കാര്‍ക്കും ക്രൂരമായ ഉപദ്രവങ്ങളാണ് ഏല്‍ക്കേണ്ടി വന്നത്.
നിരവധിപേര്‍ക്ക് ഗുരുതരമായി പരിക്കേറ്റു. പലരും അബോധാവസ്ഥയിലായി. എന്നിട്ടും അവരെ പൊലിസ് വാഹനത്തിനുള്ളില്‍ നിന്ന് പുറത്തെത്തിക്കാനോ വൈദ്യസഹായം നല്‍കാനോ ഉദ്യോഗസ്ഥര് ശ്രമിച്ചില്ലെന്നും പരാതിയുണ്ട്.
തനിക്കുനേരെ പൊലിസ് നടത്തിയ ക്രൂരമായ ആക്രമണത്തില്‍, അടിയന്തര ഇടപെടലും സ്വതന്ത്ര അന്വേഷണവും വേണമെന്നും പാര്‍ലമെന്‍റംഗങ്ങളുടെ അവകാശം സംരക്ഷിക്കണമെന്നും കാണിച്ച് ജോണ്‍ ബ്രിട്ടാസ് എംപി രാഷ്‌ട്രപതി, രാജ്യസഭാ ചെയര്‍മാന്‍, ചീഫ് ജസ്റ്റീസ് എന്നിവര്‍ക്ക് ഇന്നലെ രാത്രിയില്‍ കത്തയച്ചു.
മാധ്യമപ്രവര്‍ത്തകരെയും വേട്ടയാടി
ന്യൂഡല്‍ഹി: ദേശീയ തലസ്ഥാനത്തെ പ്രതിഷേധങ്ങള്‍ റിപ്പോര്‍ട്ട് ചെയ്യാനെത്തുന്ന മാധ്യമപ്രവര്‍ത്തകരെ ഡല്‍ഹി പൊലിസും കേന്ദ്രസേനകളും ചേര്‍ന്ന് വേട്ടയാടുകയാണ്. മലയാള മാധ്യമങ്ങളില്‍നിന്നുള്‍പ്പടെയുള്ള പന്ത്രണ്ട് മാധ്യമപ്രവര്‍ത്തകരെയാണ് ഇന്നലെ മാത്രം കസ്റ്റഡിയിലെടുത്തത്. കൊണാട്ട് പ്ലേസിലെ പ്രതിഷേധം റിപ്പോര്‍ട്ട് ചെയ്യാനെത്തിയ ഏഷ്യാനെറ്റ് ന്യൂസ്, 24 ന്യൂസ് എന്നീ മലയാള മാധ്യമ സ്ഥാപനങ്ങളിലെ റിപ്പോര്‍ട്ടര്‍മാരെയാണ് കസ്റ്റഡിയിലെടുത്തത്.
സ്ഥാപനത്തിന്‍റെ ഐഡി കാര്‍ഡ് കാണിച്ചിട്ടും ഇവരെ പൊലിസ് വാഹനത്തിലേക്ക് ഉദ്യോഗസ്ഥര് ബലംപ്രയോഗിച്ച് തള്ളിക്കയറ്റുന്നതിന്‍റെ ദൃശ്യങ്ങളുമുണ്ട്. മറ്റ് മലയാളി മാധ്യമപ്രവര്‍ത്തകര്‍ ഇവരെ കയറ്റിയ വാഹനം തടയുകയും കസ്റ്റഡിയിലെടുത്തവരെ വിട്ടയ്ക്കാന്‍ പൊലിസിനോട് വാദിക്കുകയും തര്‍ക്കിക്കുകയും ചെയ്തു. സംഭവസ്ഥലത്ത് യാതൊരു ക്രമസമാധാന പ്രശ്‌നവും ഉണ്ടായിരുന്നില്ലെന്നും കാരണമൊന്നും കൂടാതെയായിരുന്നു പൊലിസ് നടപടിയെന്നും കസ്റ്റഡിയിലായവര്‍ വെളിപ്പെടുത്തി.
ആര്‍കെ ആശ്രമം മാര്‍ഗിലെ പ്രതിഷേധം റിപ്പോര്‍ട്ട് ചെയ്യാന്‍ എത്തിയ ഏഴ് മാധ്യമപ്രവര്‍ത്തകരെയും പൊലിസ് കസ്റ്റഡിയില്‍ എടുത്തുവെന്നാണ് വിവരം. ഇന്ത്യന്‍ എക്‌സ്പ്രസ് ഹിന്ദി, പീക്ക് ടിവി, ഹിന്ദുസ്ഥാന്‍ ടൈംസ് റിപ്പോര്‍ട്ടര്‍മാരും ഇതില്‍ ഉള്‍പ്പെടുന്നു. കണ്ണൂര്‍ സ്വദേശിയായ ഒരു സ്വതന്ത്ര മാധ്യമപ്രവര്‍ത്തകയെയും കസ്റ്റഡിയിലെടുത്തിട്ടുണ്ട്. മാധ്യമപ്രവര്‍ത്തകരെ അവരുടെ ജോലി ചെയ്യാന്‍ അനുവദിക്കണമെന്ന് സുപ്രീംകോടതി പൊലിസിന് ഇന്നലെ നിര്‍ദേശം നല്‍കിയതിന് പിന്നാലെയുള്ള ഈ നടപടികള്‍ വ്യാപക പ്രതിഷേധത്തിന് വഴിവച്ചിട്ടുണ്ട്. കസ്റ്റഡിയിലെടുത്തവരെ ഇന്നലെ വൈകുന്നേരത്തോടെ വിട്ടയച്ചു.
ശനിയാഴ്ചത്തെ പ്രതിഷേധം റിപ്പോര്‍ട്ട് ചെയ്യാന്‍ എത്തിയ റിപ്പോര്‍ട്ടര്‍ ചാനലിലെ രണ്ട് പേരെ കസ്റ്റഡിയിലെടുത്തിരുന്നു. മലയാള മനോരമയിലെയും മനോരമ ന്യൂസ് ചാനലിലെയും മൂന്ന് പേരെയും പൊലിസ് കൈയേറ്റം ചെയ്തിരുന്നു. ദ ക്വിന്‍റ്,സ്ക്രോള്, ന്യൂസ് ലോണ്‍ട്രി, നവഭാരത് ടൈംസ് തുടങ്ങിയ മാധ്യമ സ്ഥാപനങ്ങളിലെ മാധ്യമപ്രവര്‍ത്തകരെയും കഴിഞ്ഞ ദിവസങ്ങളില്‍ തടഞ്ഞുവയ്ക്കുകയും കസ്റ്റഡിയിലെടുക്കാന്‍ ശ്രമിക്കുകയും ചെയ്തിരുന്നു.
പൊലിസ് യൂണിഫോം ഇല്ലാത്തവരും മർദിച്ചെന്ന് ആരോപണം
ന്യൂഡൽഹി: പൊലിസിനൊപ്പം കാവി ഷാൾ കൊണ്ട് മുഖംമറിച്ച ചിലർ പ്രതിഷേധക്കാരെ വടികൾ ഉപയോഗിച്ച് മർദിച്ചതായി ആരോപണം. പൊലിസ് യൂണിഫോം ധരിക്കാത്ത ചിലർ മാധ്യമങ്ങളുടെ കണ്ണ് വെട്ടിച്ച് പ്രതിഷേധക്കാരെ മർദിച്ചതായുള്ള വീഡിയോ പ്രചരിച്ചതോടെയാണ് സംഭവം വിവാദമായത്. മാധ്യമങ്ങളുടെ ക്യാമറ കാണുമ്പോൾ ഇക്കൂട്ടർ ഓടിമറയുന്നതായും കാണാം.
കൂടാതെ നെയിം പ്ലേറ്റ് ധരിക്കണമെന്ന് പൊലിസിന് സുപ്രീംകോടതിയുടെ കർശന നിർദേശം നിലനിൽക്കുമ്പോഴും പലരും ഇത് ധരിക്കുന്നില്ലെന്ന സൂചിപ്പിക്കുന്ന നിരവധി വീഡിയോകൾ സമൂഹമാധ്യമത്തിൽ പ്രചരിക്കുന്നുണ്ട്.
ശനിയാഴ്ച നടന്ന പ്രതിഷേധത്തിൽ ഒരു വിദ്യാർഥിനിയെ ക്രൂരമായി മർദിച്ച ഹിന്ദു രക്ഷാ ദൾ സംഘടനയുമായി ബന്ധമുള്ള നാലുപേരെ പൊലിസ് അറസ്റ്റ് ചെയ്തു. ഗാസിയാബാദ് കേന്ദ്രീകരിച്ച് പ്രവർത്തിക്കുന്ന പിങ്കി ചൗധരിയുടെ നേതൃത്വത്തിലുള്ള ഈ സംഘടന മുമ്പും പ്രതിഷേധക്കാർക്കെതിരേ ഭീഷണി മുഴക്കിയിട്ടുണ്ടെന്നും സനാതന ധർമത്തിന്‍റെ പേരിലുള്ള അക്രമങ്ങളെ ന്യായീകരിച്ച് സമൂഹമാധ്യമങ്ങളിൽ പോസ്റ്റുകൾ പങ്കുവച്ചിട്ടുണ്ടെന്നും കണ്ടെത്തിയിട്ടുണ്ട്.
പൊലിസിനെതിരേ ദിപ്കെയുടെ കുടുംബം
ന്യൂഡൽഹി: സിജെപി സ്ഥാപകൻ അഭിജീത് ദിപ്കെയുടെ മോചനം ഡൽഹി പൊലിസ് മനഃപൂർവം വൈകിച്ചെന്ന് കുടുംബത്തിന്‍റെ ആരോപണം. മുത്തശിയുടെ സംസ്കാര ചടങ്ങുകളിൽ പങ്കെടുക്കാൻ അനുമതി തേടി ആവർത്തിച്ച് അപേക്ഷിച്ചിട്ടും പൊലിസ് തയാറായില്ലെന്നും വൈകി മോചിപ്പിച്ചതിനാൽ മുത്തശിയുടെ സംസ്കാരച്ചടങ്ങിൽ പങ്കെടുക്കാൻ അഭിജീത് ദിപ്കെക്ക് സാധിച്ചില്ലെന്നും കുടുംബം ആരോപിച്ചു.
അഭിജീത്തിന്‍റെ മുത്തശി സാവത്രിബായ് ശങ്കർറാവു ദിപ്കെ (85) വാർധക്യസഹജമായ അസുഖങ്ങളെതുടർന്ന് ശനിയാഴ്ച മഹാരാക്ഷ്‌ട്രയിലെ ഹിംഗോളി ജില്ലയിലെ വസതിയിലാണ് അന്തരിച്ചത്. ഞായറാഴ്ച രാവിലെയാണു സംസ്കാരച്ചടങ്ങുകൾ ക്രമീകരിച്ചിരുന്നത്.
അഭിജീത്തിനു വേണ്ടി കാത്തിരുന്നെങ്കിലും കസ്റ്റഡിയിൽ നിന്ന് വിട്ടുകിട്ടാൻ ഏറെ വൈകിയെന്ന് ഇളയച്ഛൻ വിലാസ് ദിപ്കെ പറഞ്ഞു. മുത്തശിയുടെ ചിതാഭസ്മം നിമജ്ജനം ചെയ്യുന്ന ചടങ്ങിലെങ്കിലും ദിപ്കെ പങ്കെടുക്കാൻ അനുവദിക്കണമെന്നും അദ്ദേഹം ആവശ്യപ്പെട്ടു
അതേസമയം, കുടുംബത്തിന്‍റെ ആരോപണം തള്ളി ഡൽഹി പൊലിസ് രംഗത്തെത്തി. വിയോഗവാർത്ത അഭിജിതിനെ അറിയിച്ചിരുന്നെന്നും നാട്ടിലേക്കു മടങ്ങാനുള്ള എല്ലാ സൗകര്യങ്ങളും വാഗ്ദാനം ചെയ്തിരുന്നെന്നും എന്നാൽ അദ്ദേഹം അതു നിരസിച്ചെന്നും ഡൽഹി പൊലിസ് പറയുന്നു.
പ്രതിഷേധത്തിനു തൊട്ടുമുമ്പ് പൊലിസ് തട്ടിക്കൊണ്ടു പോയി: ധ്രുവ് റാഠി
ന്യൂഡല്‍ഹി: ജന്തര്‍ മന്തറിലെ ശനിയാഴ്ചത്തെ സിജെപി പ്രതിഷേധത്തിന് തൊട്ടുമുമ്പ് പൊലിസ് പിടികൂടി രഹസ്യകേന്ദ്രത്തില്‍ പാര്‍പ്പിച്ച പ്രമുഖ യൂട്യൂബര്‍ ധ്രുവ് റാഠി മോചിതനായി. പിന്നാലെ ഇന്‍സ്റ്റഗ്രാമില്‍ വിഡിയോയുമായി എത്തിയ ധ്രുവ് റാഠി തന്‍റെ ഇന്ത്യന്‍ പാസ്‌പോര്‍ട്ട് ഉയര്‍ത്തിക്കാട്ടി താന്‍ ഇന്ത്യക്കാരനാണെന്നും പൗരത്വത്തില്‍ ആര്‍ക്കും സംശയം വേണ്ടെന്നും വ്യക്തമാക്കി.
നിയമപരമായ നടപടിക്രമങ്ങളുടെ ഭാഗമായിട്ടാണ് കസ്റ്റഡിയിലെടുത്തതെന്ന ഗുരുഗ്രാം പൊലിസിന്‍റെ വാദങ്ങളെ അദ്ദേഹം തള്ളി. അറസ്റ്റ് ചെയ്യുകയോ കസ്റ്റഡിയിലെടുക്കുകയോ അല്ല, യൂണിഫോം ഇല്ലാത്ത ഇരുപതോളം വരുന്ന സംഘം തന്നെ തട്ടിക്കൊണ്ടുപോവുകയായിരുന്നുവെന്നും പറഞ്ഞു.
കരുതല്‍തടങ്കലില്‍നിന്ന് മോചിതനാകാന്‍ ഗുരുഗ്രാം പൊലിസിനു മുമ്പാകെ താന്‍ രേഖാമൂലമുള്ള യാതൊരുവിധ ഉറപ്പുകളോ മുദ്രപത്രങ്ങളോ ഒപ്പിട്ടുനല്‍കിയിട്ടില്ലെന്നും അദ്ദേഹം വ്യക്തമാക്കിയിട്ടുണ്ട്. ശനിയാഴ്ച രാത്രി വളരെ വൈകിയായിരുന്നു ധ്രുവ് റാഠിയെ പൊലിസ് വിട്ടയച്ചത്.
ഡൽഹിയിൽ അടിയന്തരാവസ്ഥയെന്ന് സിജെപി
ന്യൂഡൽഹി: യുവജനപ്രക്ഷോഭത്തെ അടിച്ചമർത്താൻ ഡൽഹിയിൽ അടിയന്തരാവസ്ഥ അടിച്ചേൽപ്പിച്ചതായി സിജെപി. ഡൽഹിയിൽ കടുത്ത നിയന്ത്രണങ്ങൾ ഏർപ്പെടുത്തിയതോടെ യാതൊരു ബന്ധവുമില്ലാത്ത സാധാരണ ജനങ്ങളാണ് ദുരിതത്തിലായതെന്ന് പൊലിസ് കസ്റ്റഡിയിൽനിന്നു മോചിതരായ ശേഷം സിജെപി നേതാക്കളായ സൗരവ് ദാസും അശുതോഷ് റങ്കയും സംയുക്ത പത്രസമ്മേളനത്തിൽ വിമർശിച്ചു.
ഡൽഹി പൊലിസ് വിമാനത്തിൽ നിന്നും ശനിയാഴ്ച കസ്റ്റഡിയിലെടുത്ത സിജെപി കൺവീനർ അഭിജീത് ദിപ്കെ, വക്താക്കളായ സൗരവ് ദാസ്, അശുതോഷ് റങ്ക എന്നിവരെ ഞായറാഴ്ച രാവിലെയാണ് കോടതി വിട്ടയച്ചത്.
24 മണിക്കൂറിലധികം നീണ്ട തടങ്കലിനൊടുവിൽ ഡൽഹി എക്സിക്യൂട്ടീവ് മജിസ്ട്രേറ്റ് കോടതിയാണ് ഒരു വർഷത്തേക്ക് സമാധാന അന്തരീക്ഷം തടസപ്പെടുത്തുന്ന യാതൊരുവിധ പ്രവർത്തനങ്ങളിലും ഏർപ്പെടരുതെന്ന ഉപാധിയോടെ മോചിപ്പിച്ചത്.
മുത്തശിയുടെ മരണാന്തര ചടങ്ങിൽ പങ്കെടുക്കാൻ അഭിജീത് ദിപ്കെ ഇന്നലെ മുംബൈയിലേക്കു പോയിരുന്നു.
ഡൽഹിയിൽ 30,000ത്തോളം സുരക്ഷാ ഉദ്യോഗസ്ഥരെ വിന്യസിച്ച് ഒരു സൈനികത്താവളംപോലെ മാറ്റിയതായും സിജെപി വാർത്ത സമ്മേളനത്തിൽ ആരോപിച്ചു. സമരക്കാർക്കെതിരെ ജനവികാരം തിരിച്ചുവിടാൻ ലക്ഷ്യമിട്ടാണ് മെട്രോ സ്റ്റേഷനുകളും ട്രെയിൻ സർവീസുകൾ ഉൾപ്പെടെയുള്ളവയും റദ്ദാക്കി പൊതുഗതാഗതവും കച്ചവട പ്രവർത്തനങ്ങളും കേന്ദ്രസർക്കാർ തടസപ്പെടുത്തിയത്.
ശനിയാഴ്ച കസ്റ്റഡിയിലായിരുന്ന സമയത്ത് അഭിജിത് ദീപ്‌കെയുടെ മുത്തശിയുടെ വിയോഗ വാർത്ത പൊലിസ് അറിയിച്ച രീതി തീർത്തും മനുഷ്യത്വരഹിതവും ലജ്ജാകരവുമാണെന്ന് സിജെപി വക്താക്കൾ വിമർശിച്ചു. വ്യക്തിപരമായ ദുഃഖത്തിന്‍റെ നിമിഷത്തെ ക്യാമറകളും മൈക്രോഫോണുകളും ഉപയോഗിച്ച് ഒരു കാഴ്ചയാക്കി മാറ്റുകയാണ് പൊലിസ് ചെയ്തതെന്നും സിജെപി ആരോപിച്ചു.
ജനാധിപത്യം തടവറയിലാകുന്ന തെരഞ്ഞെടുപ്പുകൾ
(ആന്‍റോ ആന്‍റണി എംപി)
പൗരന്മാരുടെ സ്വാതന്ത്ര്യത്തിനു മുൻഗണന നൽകിയ മഹത്തായ ജനാധിപത്യ പാരമ്പര്യമാണ് ഇന്ത്യയുടേത്. ഭരണഘടനാ ശില്പിയായ ഡോ. ബി.ആർ. അംബേദ്കറും പണ്ഡിറ്റ് ജവഹർലാൽ നെഹ്റുവും മഹാത്മാഗാന്ധിയും ചേർന്ന് രാജ്യത്തെ മുന്നോട്ട് നയിച്ചപ്പോൾ “ഒരാൾക്ക് ഒരു വോട്ട്, ആ വോട്ടിന് ഒരേ മൂല്യം’ എന്ന ഭരണഘടനാ തത്വം യാഥാർഥ്യമായി.
എന്നാൽ, ഇന്ന് ഭരണഘടനാ സ്ഥാപനങ്ങളെ സ്വന്തം കാര്യസാധ്യത്തിനായി വശംവദരാക്കുകയും, ജനവിധിയെ അട്ടിമറിക്കാൻ ഭരണകൂടത്തിന്‍റെ കുഴലൂത്തുകാരായി അവരെ മാറ്റുകയും ചെയ്യുന്ന ഭയാനകമായ ദുരവസ്ഥയ്ക്കാണ് ഭാരതം സാക്ഷ്യംവഹിക്കുന്നത്.
നിയമനത്തിലെ അട്ടിമറി-2023ലെ നിയമം
ഒരു സ്വതന്ത്ര തെരഞ്ഞെടുപ്പ് കമ്മിഷന്‍റെ സുതാര്യത ആരംഭിക്കുന്നത് അതിന്‍റെ തലപ്പത്തുള്ള കമ്മിഷണർമാരുടെ നിയമനത്തിലൂടെയാണ്. ഭരണഘടനയുടെ 324-ാം അനുച്ഛേദം അനുസരിച്ച് തെരഞ്ഞെടുപ്പ് കമ്മിഷനെ നിയമിക്കുന്നതിന് പാർലമെന്‍റ് നിയമം കൊണ്ടുവരണമെന്ന് വ്യവസ്ഥയുണ്ട്.
2023 മാർച്ച് 2-ന് സുപ്രീം കോടതിയുടെ അഞ്ചംഗ ഭരണഘടനാ ബെഞ്ച് ഒരു ചരിത്ര വിധി പുറപ്പെടുവിച്ചു. പാർലമെന്‍റ് നിയമം കൊണ്ടുവരുന്നതുവരെ, തെരഞ്ഞെടുപ്പ് കമ്മിഷണർമാരെ നിയമിക്കുന്നത് പ്രധാനമന്ത്രി, ലോക്സഭയിലെ പ്രതിപക്ഷ നേതാവ്, സുപ്രീംകോടതി ചീഫ് ജസ്റ്റീസ് എന്നിവരടങ്ങിയ സമിതിയായിരിക്കണം എന്നായിരുന്നു വിധി. എന്നാൽ ആ വിധിയുടെ നിഷ്പക്ഷതയെ മറികടക്കാൻ 2023 ഡിസംബർ 12ന് കേന്ദ്ര സർക്കാർ നിയമം പാസാക്കി. അതിൽ സുപ്രീംകോടതി ചീഫ് ജസ്റ്റീസിനെ സമിതിയിൽ നിന്ന് പുറത്താക്കി, പകരം പ്രധാനമന്ത്രി നോമിനേറ്റ് ചെയ്യുന്ന ഒരു കേന്ദ്ര കാബിനറ്റ് മന്ത്രിയെ ഉൾപ്പെടുത്തി. മൂന്നംഗ സമിതിയിൽ ഭൂരിപക്ഷം ഭരണപക്ഷത്താകുന്നതോടെ, തങ്ങൾക്ക് ഇഷ്‌ടമുള്ളവരെമാത്രം തിരഞ്ഞെടുപ്പ് കമ്മിഷന്‍റെ തലപ്പത്ത് നിയമിക്കാൻ വഴിതുറന്നു.
ഫോം ആറി ലെ മാറ്റവും സുപ്രീംകോടതിയുടെ പരാമർശവും
പ്രത്യേക തീവ്ര വോട്ടർപട്ടിക പുതുക്കൽ നടപടിയുടെ മറവിൽ ലക്ഷക്കണക്കിന് വോട്ടർമാരുടെ പേരുകൾ വെട്ടിമാറ്റപ്പെട്ടു. പുതിയ വോട്ട് ചേർക്കാനുള്ള ഫോം ആറിനോടൊപ്പം ഒരു അധിക ഡിക്ലറേഷൻ കൂട്ടിച്ചേർത്തതാണ് വിവാദമായത്. അതിന് സുപ്രീംകോടതി അനുമതിയില്ലെന്നതും പിന്നീട് തെളിഞ്ഞു. ഇതിനിടെ കമ്മിഷനിലെ അഭിപ്രായവ്യത്യാസങ്ങളും പുറത്തുവന്നു.
സെക്ഷൻ 16- വിവാദമായ നിയമപരിരക്ഷ
ഈ വിവാദങ്ങൾക്കൊപ്പം ചേർത്ത് വായിക്കേണ്ടതാണ് 2023ലെ പുതിയ നിയമത്തിലെ സെക്ഷൻ 16. ഇതനുസരിച്ച് പദവിയിൽ ഇരിക്കുമ്പോൾ മാത്രമല്ല, സ്ഥാനമൊഴിഞ്ഞ ശേഷവും കേസ് എടുക്കാൻ കഴിയില്ല. ഔദ്യോഗിക കൃത്യമാണെന്ന് തോന്നിപ്പിക്കുന്ന പ്രവൃത്തിക്കും സംരക്ഷണം ലഭിക്കും. സാധാരണയായി പൊതുസേവകർക്കുള്ള സംരക്ഷണ നിയമങ്ങളിൽ “നല്ല വിശ്വാസത്തിൽ ചെയ്ത പ്രവൃത്തി’ എന്ന് നിബന്ധനയുണ്ട്. അതും ഒഴിവാക്കിയിരിക്കുന്നു എന്നാണ് നിയമവിദഗ്ധർ ചൂണ്ടിക്കാട്ടുന്നത്.
ആറ് സംസ്ഥാനങ്ങളിലെ ആരോപണങ്ങൾ-ഒരു പഠനം
പശ്ചിമ ബംഗാൾ, മഹാരാഷ‌്ട്ര, ഡൽഹി, മധ്യപ്രദേശ്, പഞ്ചാബ്, ഒഡീഷ എന്നീ സംസ്ഥാനങ്ങളിൽ എസ്ഐആർ നടപടികളുടെ മറവിൽ ക്രമക്കേട് നടന്നതായി പ്രതിപക്ഷകക്ഷികൾ ആരോപിക്കുന്നു. ഇവയെല്ലാം ആരോപണങ്ങളാണ്, എന്നു പറഞ്ഞ് തടിതപ്പാൻ ശ്രമിച്ചേക്കാം. പക്ഷെ ഇതിനെല്ലാം മറുപടി പറയേണ്ടത് തെരഞ്ഞെടുപ്പ് കമ്മിഷനാണ്. പ്രാദേശിക തലത്തിൽ ബിഎൽഒമാർ വീടുകളിൽ നേരിട്ടെത്തി നടത്തിയിരുന്ന സർവേകൾക്ക് പകരം ഡൽഹിയിലിരുന്ന് അൽഗോരിതം ഉപയോഗിച്ച് വോട്ടുകൾ നീക്കം ചെയ്യുന്നു എന്നതാണ് പ്രധാനമായി ഉന്നയിക്കുന്നത്.
വോട്ടർപട്ടികയിലെ ഈ ക്രമക്കേടിനെ കുറിച്ച് രാഹുൽ ഗാന്ധി 2025 മുതൽ തന്നെ മുന്നറിയിപ്പ് നൽകിയിരുന്നു. രാഹുൽ ഗാന്ധി ഉന്നയിച്ചത് വെറും രാഷ്ട്രീയ ആരോപണമല്ല, മറിച്ച് സ്ഥാപനത്തിനുള്ളിലെ യാഥാർഥ്യമായിരുന്നു എന്ന് ഇതോടെ തെളിഞ്ഞു. നിയമന പ്രക്രിയയിൽ സുപ്രീംകോടതി ചീഫ് ജസ്റ്റീസ് അടങ്ങുന്ന നിഷ്പക്ഷ സമിതിയെ തിരിച്ചുകൊണ്ടുവരികയും, വോട്ടർ പട്ടികയിലെ ആശങ്കകൾ പരിഹരിക്കുകയും ചെയ്തെങ്കിൽ മാത്രമേ ജനവിശ്വാസം വീണ്ടെടുക്കാനാകൂ.
നമ്മുടെ ചോദ്യം
ഒരു ഗ്രാമത്തിലെ സാധാരണ വോട്ടറെ സംബന്ധിച്ച് കാര്യം വളരെ ലളിതമാണ്: തന്‍റെ പേര് വോട്ടർ പട്ടികയിൽ ഉണ്ടാകണം. അത് അന്യായമായി വെട്ടിമാറ്റപ്പെട്ടാൽ ചോദ്യംചെയ്യാൻ തനിക്ക് അവകാശമുണ്ടാകണം. വോട്ടവകാശം അപഹരിക്കുന്നവർക്ക് ആജീവനാന്ത കവചം ഉണ്ടാകരുത്.
ജനാധിപത്യത്തിൽ അവസാന വാക്ക് വോട്ടറുടേത് തന്നെയായിരിക്കണം. ഭരണഘടന ഉയർത്തിപ്പിടിക്കുന്ന മൂല്യങ്ങളും പൗരന്‍റെ അവകാശങ്ങളും സംരക്ഷിക്കാൻ ഇന്ത്യൻ നാഷണൽ കോൺഗ്രസ് നടത്തുന്ന പോരാട്ടങ്ങൾ ചരിത്രത്തിൽ പൊൻഅക്ഷരങ്ങളാൽ അടയാളപ്പെടുത്തപ്പെടും. ആ പോരാട്ടവീഥികളിൽ മുൻനിരയിൽ നിലയുറപ്പിക്കാൻ കഴിഞ്ഞു എന്നത് ഒരു പൊതുപ്രവർത്തകൻ എന്ന നിലയിൽ എന്നെ സംബന്ധിച്ച് ഏറെ അഭിമാനകരമാണ്.
ഭരണഘടനയും പൗരന്‍റെ വോട്ടവകാശവും സംരക്ഷിക്കപ്പെടുന്നതുവരെ ഈ പോരാട്ടവും സമരങ്ങളും തുടർന്നു കൊണ്ടേയിരിക്കും.
നിയമസഭയിൽ ഇന്നു പ്രമേയം
തിരുവനന്തപുരം: മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ ഭരണഘടനാ പദവിയിൽനിന്ന് നീക്കം ചെയ്യണമെന്നാവശ്യപ്പെട്ട് നിയമസഭയിൽ ഇന്ന് മുഖ്യമന്ത്രി വി.ഡി. സതീശൻ പ്രമേയം അവതരിപ്പിക്കും. എസ്ഐആറിന്‍റെ (തീവ്ര വോട്ടർപട്ടിക പരിഷ്കരണം) പേരിൽ കൃത്യമായ മാനദണ്ഡമോ മുൻകൂട്ടിയുള്ള അറിയിപ്പുകളോ ഇല്ലാതെ, ലക്ഷക്കണക്കിന് അർഹരായ പൗരന്മാരെ വോട്ടർപട്ടികയിൽനിന്നു നീക്കംചെയ്തതായി പരാതി ഉയർന്ന സാഹചര്യത്തിലാണ് ഗ്യാനേഷ്കുമാറിനെ നീക്കണമെന്നാവശ്യപ്പെട്ടു നിയമസഭയിൽ മുഖ്യമന്ത്രിതന്നെ പ്രമേയം കൊണ്ടു വരുന്നത്.
രാജ്യത്ത് ആദ്യമായാണ് ഒരു നിയമസഭ ഇത്തരമൊരു പ്രമേയം പാസാക്കാനൊരുങ്ങുന്നത്. ചട്ടം 118 പ്രകാരമാണ് സമ്മേളനത്തിന്‍റെ ആദ്യ ദിനംതന്നെ നിയമസഭയിൽ പ്രമേയം അവതരിപ്പിക്കുന്നത്.
ദേശീയ തലത്തിൽ രാഹുൽ ഗാന്ധിയും കൂട്ടരും ഗ്യാനേഷ് കുമാറിനെതിരേ നടത്തുന്ന സമരത്തിന് ആവേശം പകരുന്നതാണ് വി.ഡി. സതീശൻ സർക്കാരിന്‍റെ പുതിയ നീക്കം. കമ്മിഷന്‍റെ നിഷ്പക്ഷതയിൽ ഗുരുതര സംശയം ഉയർന്ന സാഹചര്യത്തിൽ, വിശ്വാസ്യത നിലനിർത്താൻ ആരോപണവിധേയനായ മുഖ്യ തെരഞ്ഞെടുപ്പ് കമ്മിഷണറെ നീക്കാനുള്ള നടപടി സ്വീകരിക്കേണ്ടത് അനിവാര്യമാണെന്നു പ്രമേയത്തിൽ പറയുന്നു.
പാർശ്വവത്‌കരിക്കപ്പെട്ട വിഭാഗങ്ങൾ, ന്യൂനപക്ഷങ്ങൾ, കുടിയേറ്റ തൊഴിലാളികൾ, യുവവോട്ടർമാർ എന്നിവരുടെ വോട്ടവകാശം സാങ്കേതിക തിരിമറി, അപാകത എന്നിവയിലൂടെ കവർന്നെടുക്കുന്നത് ജനാധിപത്യ തത്വങ്ങളുടെ നഗ്നമായ ലംഘനമാണ്. നടപടി ബിജെപി ഇതര സർക്കാരുകൾ ഭരിക്കുന്ന മറ്റു സംസ്ഥാനങ്ങളും മാതൃകയാക്കിയേക്കും. കോണ്ഗ്രസിന്റെ ദേശീയ തലത്തിലെ സമരത്തിന് ആക്കം കൂട്ടാനും ഇത് ഉപകരിക്കും.
കേന്ദ്ര തെരഞ്ഞെടുപ്പ് കമ്മിഷന്‍റെ സമീപകാല പ്രവർത്തനങ്ങളുമായി ബന്ധപ്പെട്ടു ഗുരുതര ആശങ്കകളും ആരോപണങ്ങളും രാജ്യത്തുടനീളം ഉയർന്നുവന്നിട്ടുള്ള സാഹചര്യമാണ് നിലവിലുള്ളത്. 1960ലെ വോട്ടർ രജിസ്ട്രേഷൻ ചട്ടങ്ങൾ അനുസരിച്ച് ലോക്സഭ, നിയമസഭ തെരഞ്ഞെടുപ്പുകളുടെ വോട്ടർ പട്ടിക തയാറാക്കാനുള്ള ഇലക‌്‌ടറൽ രജിസ്ട്രേഷൻ ഓഫിസർമാരുടെ അധികാരം സോഫ്റ്റ്വേർ സംവിധാനത്തിലൂടെ ഇല്ലാതാക്കി.
ഭരണഘടനാ സ്ഥാപനമായ തെരഞ്ഞെടുപ്പ് കമ്മിഷൻ ഭരണകൂട സ്വാധീനങ്ങൾക്കു വഴങ്ങാതെ പൂർണമായും നിഷ്പക്ഷമായും പ്രവർത്തിക്കണം. കമ്മിഷന്‍റെ നിലവിലെ പ്രവർത്തനം അതിന്‍റെ സുതാര്യതയും വിശ്വാസ്യതയും ഇല്ലാതാക്കി. ഭരണഘടനയുടെ ആർട്ടിക്കിൾ 326 ഉറപ്പുനൽകുന്ന പൗരന്‍റെ അവകാശമാണ് വോട്ടവകാശമെന്നും അതു കവർന്നെടുത്തെന്നും പ്രമേയത്തിൽ കുറ്റപ്പെടുത്തുന്നു.
